काठमाण्डौ – महोत्तरीको लोहारपट्टी नगरपालिका– ६ का २१ वर्षीय मोबारक नदाफलाई पोलमा बाँधेर मोसो दल्ने ठेकेदार आनन्द मिश्रलाई प्रहरीले पक्राउ गरेको छ ।
काम गरेको ज्याला माग्दा महोत्तरीमा एक निर्माण व्यवसायीले मजदुरलाई अमानवीय व्यवहार गरेको घटना सार्वजनिक भएको छ । महोत्तरीको लोहारपट्टी नगरपालिका–६ का २१ वर्षीय मोबारक नदाफमाथि दुर्व्यवहार भएको हो ।
स्थानीय निर्माण व्यवसायी ३५ वर्षीय कृष्ण भनिने आन्नद भूसन मिश्रले उनीमाथि कुटपिटसहित अमानवीय व्यवहार गरेको महोत्तरीका प्रहरी नायब उपरिक्षक दिलीपकुमार गिरीले जानकारी दिए ।
चैत २३ गते बिहान नदाफलाई ज्यालाका लागि बोलाएर मिश्रले कुटपिट गर्दै चोकको विद्युत पोलमा पाता कसेर, मोसो दलेर केस मुण्डन समेत गरिदिएका छन् । प्रहरीले मिश्रलाई घटनाको भोलिपल्ट पक्राउ गरिसकेको छ ।
उनीमाथि अमानवीय अपमानजनक व्यवहार कसुरमा मुद्दा चलाएको महोत्तरीका प्रहरी नायब उपरिक्षक गिरीले बताए । अमानवीय अपमानजनक व्यवहार कसुरमा पाँच वर्षसम्म जेल सजाय हुने कानुनी व्यवस्था रहेको छ ।
मुस्लिम धर्माम्बलम्बीको अहिले रमजान (रोजा) चलिरहेको छ । पीडित परिवारका अनुसार रमजान मनाउन नदाफले निर्माण व्यवसायी कृष्ण भनिने आन्नद भूसन मिश्रसँग काम गरेको ज्याला माग गरेका थिए । पटक–पटक ज्याला माग्दा पनि नदिएपछि उनले काम गर्दैगर्दाको औजार घर लगेका थिए । औजार लिएर आउनू पैसा दिन्छु भनेर शिव आश्रममा बोलाएर ठेकेदार मिश्रले नदाफलाई चोरीको आरोप लगाउँदै चोकमा लगेर अमानवीय व्यवहार गरेको स्थानीय प्रत्यक्षदर्शीहरुले बताएका छन् ।
पीडितले जिल्ला प्रहरी कार्यालय महोत्तरीमा कृष्ण भनिने आन्नद भूसन मिश्र विरूद्ध किटानी जाहेरी समेत दिएका छन् ।
सबै किसिमका विकृतिका विरुद्ध,राष्ट्रिय स्वाधीनता,अग्रगामी परिवर्तन,सामाजिक जागरण र रुपान्तरणका पक्षमा जनचेतनाको संवाहक साथै समृद्ध समाजको संवाहक(डेली न्यूजराप्ती अनलाइन डिजिटल पत्रीका)को माध्यमबाट हामी निरन्तर डटिरहेका छौं।
©Copyright©2021-2024 शहिद महान स्मृति संचार गृह प्रा.ली.