जेठ १५,दाङ। नेपालमा आज १८औँ गणतन्त्र दिवस विभिन्न कार्यक्रम गरी मनाइँदैछ। २०६५ साल जेठ १५ गते संविधानसभाको पहिलो बैठकले २४० वर्षे राजतन्त्र अन्त्य गर्दै नेपाललाई संघीय लोकतान्त्रिक गणतन्त्र घोषणा गरेको ऐतिहासिक दिनको सम्झनामा हरेक वर्ष यो दिवस मनाइने गरिएको हो।
गणतन्त्र स्थापना नेपाली जनताको लामो संघर्ष, जनआन्दोलन, जनयुद्ध तथा हजारौँ सहिदहरूको बलिदानको परिणामका रूपमा स्थापित भएको मानिन्छ। तत्कालीन निरंकुश राजतन्त्रको अन्त्य गर्दै जनताले सार्वभौमसत्ता आफ्नो हातमा लिएको दिनका रूपमा पनि यो दिवसलाई विशेष महत्वका साथ हेरिन्छ।
गणतन्त्र दिवसका अवसरमा काठमाडौंसहित देशभर विभिन्न सरकारी तथा गैरसरकारी निकायले प्रभातफेरी, दीप प्रज्वलन, अन्तरक्रिया, सांस्कृतिक कार्यक्रम तथा सहिदप्रति श्रद्धाञ्जली अर्पण गर्ने कार्यक्रम आयोजना गरेका छन्। सरकारले पनि सैनिक मञ्च टुँडिखेलमा विशेष समारोह आयोजना गरेको छ।
राजनीतिक दल, नागरिक समाज तथा विभिन्न संघ–संस्थाले गणतन्त्रले नेपाली जनतालाई अधिकार, समावेशिता र लोकतान्त्रिक सहभागिताको अवसर प्रदान गरेको बताएका छन्। यद्यपि, गणतन्त्र स्थापनापछि पनि जनअपेक्षा अनुसार सुशासन, आर्थिक समृद्धि र सामाजिक न्याय स्थापित हुन नसकेको भन्दै सुधारको आवश्यकता औँल्याइएको छ।
यस अवसरमा राष्ट्रपति, प्रधानमन्त्री तथा विभिन्न राजनीतिक दलका नेताहरूले शुभकामना सन्देश जारी गर्दै गणतन्त्रलाई थप सुदृढ, जनमुखी र उत्तरदायी बनाउन सबै एकजुट हुनुपर्ने बताएका छन्।
गणतन्त्र दिवसले नेपाली जनतालाई लोकतन्त्र, स्वतन्त्रता र जनअधिकारको रक्षा गर्दै देशको समृद्धि र स्थायित्वका लागि नयाँ संकल्प गर्ने अवसर प्रदान गरेको छ।
सबै किसिमका विकृतिका विरुद्ध,राष्ट्रिय स्वाधीनता,अग्रगामी परिवर्तन,सामाजिक जागरण र रुपान्तरणका पक्षमा जनचेतनाको संवाहक साथै समृद्ध समाजको संवाहक(डेली न्यूजराप्ती अनलाइन डिजिटल पत्रीका)को माध्यमबाट हामी निरन्तर डटिरहेका छौं।
१० असार २०८० १४:१३
©Copyright©2021-2026 शहिद महान स्मृति संचार गृह प्रा.ली.
