तुलसीपुरमा बेथितिको चाङ: बसपार्कको कोशेली घरबाट उपमहानगरले पाएन ४ वर्षको भाडा

तुलसीपुर। दाङ तुलसीपुर ५ बसपार्क स्थित कोशेली घरले ४ वर्षसम्म पनि भाडा पाएको छैन । उपमहानगरपालिकाले महिला कृषि लघु उद्यमी समूहलाई त्यसको जिम्मा दिएको थियो ।

२०७६ मंसिरमा स्थानीय उत्पादनलाई प्रबद्र्धन गर्नकालागि उक्त कोशेली घर सञ्चालन गरिएको थियो । सोही समूहले उपमहानगरपालिकालाई फाईदाको ५ प्रतिशतका दरले प्रति महिना भाडा उपलब्ध गराउने सहमति भएको थियो ।

तर, सोही सहमति अनुसार सहकारीले भाडा उपलब्ध नगराएपछि महालेखा परीक्षणको कार्यालयले समेत प्रश्न उठाएको थियो, भने उपमहानगरपालिकाको लेखा समितिले पनि प्रश्न उठाएपछि उपमहानगरपालिकाले पनि चासो देखाएको छ ।

उपमहानगरपालिकाका राजश्व शाखा प्रमुख ललित घर्तीका अनुसार यो विषयमा अध्ययन गर्नकालागि समिति निर्माण भएको छ । कार्यपालिकाको १३ औं बैठकले आर्थिक विकास समिति संयोजक माघव वलीको संयोजकत्वमा ५ सदस्यीय कार्यदल गठन गरेको छ ।

सोही कार्यदलले दिएको सुझाब अनुरुप कार्यपालिकाले निणर्य गर्ने उपमहानगरपालिकाका प्रमुख प्रशासकीय अधिकृत रामबहादुर केसीले बताउनुभयो । उहाँका अनुसार नयाँ भाडादर कायम हुनेछ ।

साथै कोशेली घरले उपमहानगरपालिकाको साझेदारी कोषबाट लिएको ऋणको सावा ब्याज कुनै पनि बुझाएको छैन । कोशेली घरले ४ वटा सटरहरु छन् । त्यहाँ स्थानीय उत्पादन भन्दा बाह्य बस्तुहरु राखेर बेच्ने गरिएको समेत पाइएको छ ।

साभार : लाइभदाङ