काठमाडौंमा जारी आइसिसी टी–२० विश्वकप एसिया फाइनल क्षेत्र छनोटमा नेपाल दोस्रो खेलमा आज मलेसियासँग खेल्दैछ । नेपाल र मलेसियाबीचको खेल दिउँसो साढे १ बजे कीर्तिपुरस्थित त्रिवि मैदानमा सुरु हुनेछ ।
नेपाल प्रतियोगितामा लगातार दोस्रो जितको खोजीमा छ । नेपालले पहिलो खेलमा सिंगापुरलाई ८ विकेटले हराएको थियो । मलेसिया भने प्रतियोगितामा पहिलो जितको खोजीमा छ । ऊ पहिलो खेलमा ओमानसँग ३२ रनले पराजित भयो ।
मलेसियासँग हेड टु हेड
हालसम्म नेपाल र मलेसियाले एकअर्काविरुद्ध ९ टी–२० खेल खेलेका छन् । जसमा नेपालले ८ र मलेसियाले एक खेल जितेको छ । पछिल्लो पाँच खेलमा नेपालले मलेसियालाई ४ खेलमा हराएको छ ।
यी दुई टिमले अन्तिमपटक गत वर्षको अप्रिलमा खेलेका थिए । जसमा नेपाल ८५ रनले विजयी भयो । नेपाल यसपटक पनि मलेसियाविरुद्ध सहज जित निकाल्ने योजनामा छ । मलेसिया भने नेपालसँग बदला लिने दाउमा छ ।
मलेसियाविरुद्ध नेपालले सिंगापुरविरुद्धकै प्लेइङ–११ लाई निरन्तरता दिने सम्भावना छ । खुट्टाको चोटका कारण अलराउन्डर दीपेन्द्र सिंह ऐरीले मलेसियाविरुद्ध पनि खेल्ने छैनन् । उनी सिंगापुरसँग खेल्नुअघि अभ्यासका क्रममा घाइते भएका थिए । दीपेन्द्रले विश्वकप छनोट नै गुमाउने सम्भावना बढेको छ । उनको बायाँ खुट्टाको एंकलमा चोट लागेको छ ।
सिंगापुरविरुद्ध दीपेन्द्रको स्थानमा युवा अलराउन्डर विवेककुमार यादवले खेलेका थिए । विवेकले मलेसियाविरुद्ध पनि मौका पाउने सम्भावना उच्च छ । मलेसियाविरुद्ध जित निकाल्न सके नेपाल एक खेल अगावै सेमिफाइनलमा पुग्नेछ।
नेपालले समूह चरणमा बिहीबार ओमानसँग खेल्ने तालिका छ । यस्तै, समूह ‘ए’ कै ओमानले पहिलो खेलमा मलेसियालाई हराएको थियो ।
ऊ दोस्रो खेलमा मंगलबार सिंगापुरको सामना गर्दैछ । ओमान पनि नेपालसँगको भेट अगावै सेमिफाइनलको यात्रा सुरक्षित गर्ने सोचमा छ । एसिया क्षेत्र छनोटबाट फाइनल पुग्ने दुई टिमले विश्वकपमा स्थान बनाउनेछन् ।
हालसम्म आउँदो विश्वकपका लागि १६ टिमले टिकट सुरक्षित गरिसकेका छन् । अब विश्वकप खेल्ने चार देशको टुंगो लाग्न बाँकी छ ।
सबै किसिमका विकृतिका विरुद्ध,राष्ट्रिय स्वाधीनता,अग्रगामी परिवर्तन,सामाजिक जागरण र रुपान्तरणका पक्षमा जनचेतनाको संवाहक साथै समृद्ध समाजको संवाहक(डेली न्यूजराप्ती अनलाइन डिजिटल पत्रीका)को माध्यमबाट हामी निरन्तर डटिरहेका छौं।
©Copyright©2021-2024 शहिद महान स्मृति संचार गृह प्रा.ली.