फागुन ६, दाङ । नेपाल कम्युनिस्ट पार्टी (माओवादी)का महासचिव नेत्रविक्रम चन्द (विप्लव)ले एकपटक संसदबाट देशको सेवा गर्ने अवसर दिन पश्चिम दाङका जनसमुदायलाई अपिल गरेका छन्।
बुधबार दाङको तुल्सीपुरमा नेकपा (माओवादी) ३ नम्बर निर्वाचन क्षेत्र को चुनावी सभालाई सम्बोधन गर्दै विप्लवले यस्तो बताएका हुन्।
तुलसीपुरको बिएसएस पार्टी प्यालेसको प्राङ्गणमा आयोजित सभालाई सम्बोधन गर्दै विप्लवले भने – ‘जनताकै सल्लाह सुझाव र प्रस्तावमा हामी चुनावमा आएका हौँ। ६४ को निर्वाचनपछि पहिलोपटक चुनावमा आएका छौं । सडकबाट देश र जनताको पक्षमा निरन्तर सङ्घर्षरत छौँ। तपाईँहरुले नै एकपटक चुनावबाट लड्नुस् भनेपछि नै पार्टी चुनावमा गएको हो । यसपटक तपाईँको परिवर्तनको मत गुलाफमा दिएर सेवा गर्ने अवसर दिनुहोस्।’
महासचिव विप्लवले रवि-बालेन नयाँ नभएको जिकिर गर्दै राजनीतिक प्रस्ताव र एजेन्डा पुरानो भएको र रूप मात्रै नयाँ भएको बताए ।
विप्लवले भने – ‘संविधान व्यवस्था यही ठिक हो अवस्था बदल्नुपर्छ भन्ने रवि बालेन नयाँ होइनन् । संविधान र व्यवस्था नबदल्नु जेन्जी विद्रोहको मुद्दा सम्बोधन नगर्नु हो । जिन्जी पुस्ताले उठाएको राजनीतिक प्रस्ताव र भ्रष्टाचार विरोधी विद्रोहलाई हामीले समर्थन गरेका छौं। यो चुनाव सामान्य चुनाव होइन, यसले जेन्जीको मागलाई सम्बोधन गर्नुपर्छ । जेन्जीका मुद्दा र एजेन्डा लाई सम्बोधन गर्ने गरी हामीले चुनावी प्रस्तावहरू अघि बढाएका छौं । संविधानको संशोधन, पुनर्लेखन, राज्यको पुनर्संरचना, अग्राधिकारसहितको समाजवादी संघीय शासन प्रणाली लगायतका विषयहरू हामीले समेटेका छौं। हामीसँग नयाँ राजनीतिक प्रस्तावहरू छन्, त्यसकारण नयाँ हामी हौं ।’
महासचिव विप्लवले नवलपरासीमा रवि-बालेनका कार्यकर्ताले आफ्नो पार्टीका उम्मेदवार , कार्यकर्ताहरू माथि गरेको आक्रमणको घोर निन्दा गरेका थिए ।
‘घन्टीका अराजक गुण्डाहरूले हाम्रो पार्टीका उम्मेदवार, चुनावी सभामा ढुङ्गामुढा गरेको सूचना पाएका छौं । नेपाल कम्युनिस्ट पार्टी (माओवादी)को म महासचिव हुँ, रविजी रासोपाको अध्यक्ष हो, माओवादीमाथिको आक्रमणको मूल्य रविजीले महँगो चुकाउनु पर्नेछ।’
चुनावी सभालाई सम्बोधन गर्दै महासचिव विप्लवले जेन्जी आन्दोलनले अपदस्त गरेका संसदवादी दलहरूलाई जनताले भोट नदिने विचार व्यक्त गरेका थिए।
‘केपी, प्रचण्ड र देउवाले भोट पाउने स्थिति छैन । भ्रष्टाचार गरेको पैसा दिनभरि जलिनसक्ने संसदवादी पार्टीलाई जनताले भोट दिने छैनन् ,’ उनले भने, ‘अहिले समाजमा नयाँको बहस चलिरहेको छ, त्यसमा नयाँ भनेको हामी हौँ,नेकपा (माओवादी) । यो केवल सामान्य चुनाव होइन, राष्ट्रको रक्षाको महत्त्वपूर्ण पहलकदमी हो।’
चुनावी सभा कार्यक्रममा नेकपा (माओवादी)का दाङ -३ का समानुपातिक उम्मेदवार कान्छी चौधरी (जीवनी), पार्टीका पार्टीका स्थायी समिति सदस्य तथा लुम्बिनी प्रदेश इन्चार्ज सन्तोष सी (विषम), पार्टीका केन्द्रीय सदस्य तथा दाङ जिल्ला इन्चार्ज सबिन सी लगायतले सम्बोधन गर्नुभएको थियो।
नेकपा (माओवादी)का केन्द्रीय सदस्य तथा तुलसीपुर नगर कमिटीका इन्चार्ज प्रदिप सीको अध्यक्षतामा भएको कार्यक्रमको सञ्चालन पार्टीका केन्द्रीय सदस्य तथा दाङ जिल्ला सचिव तिलक सीले गर्नुभएको थियो।
कार्यक्रममा सामना सांस्कृतिक परिवार तुलसीपुरले विभिन्न सांस्कृतिक प्रस्तुति प्रस्तुत गरेको थियो।
सबै किसिमका विकृतिका विरुद्ध,राष्ट्रिय स्वाधीनता,अग्रगामी परिवर्तन,सामाजिक जागरण र रुपान्तरणका पक्षमा जनचेतनाको संवाहक साथै समृद्ध समाजको संवाहक(डेली न्यूजराप्ती अनलाइन डिजिटल पत्रीका)को माध्यमबाट हामी निरन्तर डटिरहेका छौं।
६ आश्विन २०७८ ०६:४८
५ असार २०८१ ०७:२७
६ माघ २०८१ २१:२५
©Copyright©2021-2026 शहिद महान स्मृति संचार गृह प्रा.ली.
